Valer enn fam

Enn ti-zistwar pou bann fam.

Kan bondie ti kre fam, ti finn ariv lor so siziem zour.  So zourne ti pre pou fini, me li ti ena ankor detrwa detay pou azoute lor so proze. Enn anz ki ti pe pase, vinn get li et li dimann Bondie:

-          Kifer to pran tousa letan la pou to fini li ?

-          To’nn trouv mo proze pou li ? Bondie dir li «  li bizin lavab, me fode pa ki li an plastik.  Li bizin kapav bouz plis ki desan parti so lekor e fode ki li kapav ranplas ninport ki parti ki’nn kase.  Sa bann parti la bizin kapav fonksionn dan ninport ki rezim.  So vant bizin kapav kontenir plis ki kat zanfan anmemtan…

So ba pou mazik.  Sa ba la, pou azir kouma enn medsinn, ki pou kapav swagn dimal lor enn zenou ouswa enn leker brize, e li pou ena zis de lame pou fer tousala

Anz la gagn sok!

-          Ki ete? Zis de lame? Me li inposib Senier… Anz la dir. Li get bondie, e li azoute :

-          Sa travay la tro dir, lamem finn fini tar, atann dime pou to fini li…

-          Non… Bondie dir li avek enn sourir; « Mo prese pou gete si li bon.  Mo’nn met tou mo leker ladan…  Li bizin kapav swagn limem kan li malad e li pou kapav travay dizwiter par zour.

Anz la koste, tous lazou fam la e li dir :

-          So lapo dous !

-          Wi, so lapo dous, me sa lafors karakter ki mo’nn donn li la, inkonparab !  To pa kapav imazine tou seki li kapav siporte ouswa tou seki li kapav gagne…

-          Me eski li pou kapav reflesi ? Anz la dimande

Bondie riye e li dir :

-          Nonselman li pou kapav reflesi me li pou ousi kapav koze, riye, diskite ek travay !

Anz la koste ar fam la e get li partou kote.  Li remark enn ti zafer briyan pre kot so lizie, li tous li e li dir :

-          Senier, mo krwar ki to proze ena enn ti-fwit!

Bondie fer enn sourir e met so lame lor latet sa fam la, apre li dir:

-          Mo’nn dir twa ki mo ti anvi met boukou zafer pou ki li korek… Pa traka, pa enn fwit sa, me enn ti-larm !

-          Be kifer to fer li plorer ? Anz la dimande, li nepli ti pe konpran

-          Pa traka ! Bondie dir li, «  Sa larm la, se so manier exprim limem.  So lazwa, so lapenn, so depresion, so lamour, so solitid, so soufrans me ousi so lorgey !

Anz la inpresione, li get sa fam la ankor, li sakouy so latet.

-          Me to enn zeni! To’nn pans tou seki ti bizin panse!  Sa fam la parfe, li top

Bondie fer enn gran sourir e li dir:

-          Wi, bann fam pou ena enn lenerzi ki pou etonn bann zom.  Zot kapav afront boukou difikilte.  Zot pou kapav regle tousort kalite problem, mem bann seki bien grav… Zot pou ena lamour, lazwa ek boner pou zotmem e pou donn dimoun.

Zot pou riye kan zot ti’a voudre kriye, zot pou sante kan zot ti’a voudre plore, zot pou plore kan zot kontant e zot pou riye kan zot nerve !  Zot pou lager kont linzistis e pou zot defann zot lopinion.  Zot pa aksepte « non » kouma enn repons kan zot kone ki ena enn meyer solision !  Zot pou priv zotmem pou zot fami, ouswa zot lantouraz.  Zot pa pou al get dokter pou zot, me zot pou fors lezot dimoun al get li.  Zot lamour pa pou ena okenn limit !

Zot plore kan zot zanfan reysi.  Zot kontan pou lasans zot kamarad, zot ere kan pou ena batem ouswa maryaz!  Zot leker fer mal kan enn kamarad mor, zot soufer pou lapert enn dimoun ki zot ti bien kontan.  San ki zot pou kone, zot pou ena enn pli gran lafors, kan zot pou panse ki zot nepli ena okenn lenerzi !  Zot kone ki zot ba, li mazik… Ki zot kapav geri enn ti dimal, e kan zot pou fer enn gate, zot kone ki sa pou kapav geri enn gro dimal !

Bondie pran enn gran inspirasion avan li azoute:

-          Wi ! Peyna okenn dout ! Sa proze la enn bon proze !  Mo sel regre, sel ti defo ki mo’nn trouve ar li, seki li bliye tro souvan ki so valer !

Oter : Inkoni

Tadiksion V.Wong